Mar 13 | AAI | STEP | Jesu Tafaror Bar bihamiy ana veya, ana bai’ufununayah orot ta eo, “Bai’obaiyenayan kwi’itin! Kabay gewagewasin maiyow naatu bar hiwowowab ana’itin gewasin maiyow.”

f 13.14Dan 9.27; 11.31; 12.11

g 13.15 Luk 17.31

h 13.17 Luk 23.29

i 13.19Dan 12.1; Rev 7.14

j 13.22 Rev 13.13

k 13.24-25Isa 13.10; Jol 2.10, 31; 3.15; Rev 6.12-13

l 13.26 Rev 1.7

m 13.27 Mat 13.41

p 13.35 Luk 12.38

Mark 13

Jesu Tafaror Bar Gurusin Ana Tur Eo

1 Jesu Tafaror Bar bihamiy ana veya, ana bai’ufununayah orot ta eo, “Bai’obaiyenayan kwi’itin! Kabay gewagewasin maiyow naatu bar hiwowowab ana’itin gewasin maiyow.”

2 ^aJesu iya’afut eo, “Iti bar gagamin kwi’i’itin boro men kafa’imo kabay ta ana efanamaim kwana’itinimih, etei boro nihururuw nara’iy nasawar.”

Yare Naatu Bai’akir

3 Jesu yen in Olive Oyaw tafan Tafaror Bar batabat rounane imaim mare ma’am basit Peter, James, John naatu Andrew wa’iwa’iramaim hina biyan hitit, 4 hibatiy, “Kuo anowar mar boro biy iti sawar hinamatar? Naatu ina’inanen boro abisa ni’obaiyi ana so’ob veya ina ebiyubin.”

5 Imaibo Jesu hai tur eowen eo, “Mata toniwa’an men yait ta nan nikubibiruwimih. 6 Sabuw moumurih na’in boro ayu wabu’umaim hinao, ‘Ayu’uban iti!’ Naatu moumurih maiyow boro hinanawiyih hai ef hinasair. 7 Baiyow nidun iti yubinamaim o ef yokamaim kwananonowar men kwanabir, sawar iti na’atube boro hinamatar, baise men kwananot mar yomanin i natit. 8 Tafaram ta boro namisir tafaram ta hairi hiniyow, aiwob ta boro aiwob ta hairi hiniyow. Nati’imaim iriyoy tafaram etei boro nab, naatu baimar kakafin boro namatar. Iti sawar hinamamatar i babin taubumih kek ebobotukwar na’atube. 9 ^bKwa i kwanakaifi gewas mata toniwa’an, kwa boro hinafatumi naatu hinabuwi kwanan baibabatiyi isan, Kou’ay Baremaim boro hinaborabirabi, bonawiyenayah hai ukwarih naatu aiwob nahimaim kwanabat ayu wabu’umaim tur Gewasin hai tur kwana’owen. 10 Baise wan tur gewasin tafaram wanawanan sabuw etei isah kwanabinan. 11 ^cNaatu hinafatumi baibabatiy isan kwananan men tur isan kwaniyababan kwanabirumih, tur o ana veya abisa a notamaim etitit i kwanao, anayabin men kwa kwao’omih, baise Anun Kakafiyin.

12 ^d“Oro’orot boro taiyuwih taituwah babah hinao hinamorob, regaregah boro natunatuh babah hinao hinamorob, kek boro hinitafasar hinah tamah babah hinao hinamorob. 13 ^eSabuw etei boro hinifa’ifa’i anayabin ayu isou, baise orot yait nabatabatkikin yomaninamaim boro yawas nab.

Ororsa’iren Bir Kakafin

14 ^f“Gurugurusen ana sawar itinin birubir kakafin marasika nati’imaim men batabat boro nabatabat kwana’i’itin ana veya, sabuw iyab Judea tema’am boro hinabihir hin oyawamaim hinatit, o yait kubiyab iti tur anayabin i naso’ob. 15 ^gOrot yait ana bar afe’en ema’am men narubir o nare ana bar wanawanan narun ana sawar nabow. 16 Orot yait ma masaw ebob men namatabir bar ana faifuw nabaimih, 17 ^hNati ana veya’amaim baibin iyab yah auman naatu kek tibitotomanen boro yababan gagamin maiyow hinab! 18 Kwanayoyoban saise iti sawar men yakukur ana veya namatar. 19 ⁱAnayabin iti bai’akir kakafin boun emamatar i aneika God tafaram bimatar iti na’atube men matar naatu boro men namatar maiye. 20 Baise Regah nati veya men tayayakabum na’at, sabuw boro men yawas hitab, baise i ana sabuw rurubiniyih isah iti veya yakabum. 21 Naatu nati ana veya orot yait isa nao, ‘Kwanuw Keriso enan kwa’itin’, o iban ‘Iti ema’am!’ Men kwanitumitum. 22 ^jAnayabin Keriso na’atube naatu dinab orot na’atube boro hinatit ina’inan ta ta, naatu baifofofor fairih hinasinaf sabuw hinabonawiyih hai ef hinasair, naatu hai ef nama’am na’at God ana roubinen sabuw auman boro hai ef hinawasa’ir. 23 Sawar iti etei isah ao kwanonowarabo namatar, imih kwanakaifi gewas!

Orot Natu Nanan Veya

(Matthew 24.29-31; Luke 21.25-28)

24 ^kBaise nati bai’akir hinamamatar ana veya,

‘I nanamaim veya boro matan nagugum,
naatu sumar boro men nakaw,
25 daman auyomane boro hinihururuw hinare,
naatu mar ana sawar etei boro niyuwiyuw,
fair ta ta maramaim boro hai efan hinasairen.’
26 ^l“Nati ana veya’amaim Orot Natun boro kasakasaw wanawananamaim nanan kwana’itin ana fair bonamanamarin auman. 27 ^mI boro ana tounamatar niyafarih hinatit tafaram tutufin wanawanan ana huhun etei kwafe’en imaim hinarun hinatit God ana roubiniyen sabuw hinabow hinan yomanin hinatit.

Ai Fofou

28 “Ai fofou rourinamaim ebi’obaiyi kwana’itin, ai famefamenamaim rourin narusasar kwana’i’itin kwa boro kwanao ai abeb ana veya tit, 29 ef i nati ta’imon sawar iti hinamatar kwana’i’itin, kwa i kwanaso’ob veya i nakabom, iyubin etawan awan ebatabat. 30 Anababatun a tur ao’owen, sabuw iti tema’am boro hinama’am sawar namatar hina’itinibo hinamorob. ^{▼▼13.30sabuw iyab iti boun kwatufuw kwama’ama} 31 Mar tafaram boro nasawar, baise ayu au tur boro men nasawar.”

Veya, Fur Naatu Sumar Men Yait So’ob

32 “Men yait ta veya o fur so’obamih, tounamatar no maramaim na’atube i Natun, baise Tamah akisinamo so’ob. 33 Mata toniwa’an ^{▼▼13.33mata toniwa’an kwana yoyoban} kwanabat yewayew, anayabin veya men kwaso’ob mar biy boro namatar. 34 Ana itinin i nanawan orot na’atube, orot bainanawanamih ana’akir wairafih boro ta’ita’imon bowabow nitih. Naatu orot etawan kaifin isan ya’iyai boro nau, matan toniwa’an etawan nakaif nama.

35 ^pImih mata toniwa’an, anayabin kwa men kwaso’ob orot bar matuwan i boro biy namatabir, rabirab nan, o fai inusabobor, kwasiy hinao ana veya, o yasi’uw, 36 naniyan meyemeye natitit na’at men kwana’inu’in natitamih. 37 Abisa au’uwi, i sabuw etei isah ao’o, ‘Mata toniwa’an!’”